Mən Goranı çox sevirəm, amma hazırda Alkaraz və Sinner qarşısında favorit olduğumu düşünmürəm", Djokovic keçmiş məşqçisi İvanişeviçin sözlərinə reaksiya verdi
Novak Djokovic, Aleks De Minauru dörd setdə (1-6, 6-4, 6-4, 6-4) məğlub edərək Vimbldonun 1/4 finalına yüksəldi.
Yeddi dəfə çempion olmuş tennisçi üçün görüş heç də asan olmadı. O, matçın əvvəlində öz standartlarından uzaq bir performans göstərdi, lakin tədricən oyuna girdi. Mətbuat konfransında Djokovicdən keçmiş məşqçisi Goran İvanişeviçin son açıqlamaları ilə bağlı sual verildi. İvanişeviç onu Karlos Alkaraz və Yannik Sinner qarşısında turnirin favoriti kimi qiymətləndirmişdi:
"Mən Goranı çox sevirəm və onun da məni sevdiyini görüb xoşbəxtəm. Amma hazırda bu uşaqlar qarşısında favorit olduğumu düşünmürəm. Düşünürəm ki, onların hər ikisi favoritdir. Lakin burada onlara qarşı ən yaxşı şanslarım var. Əgər onlardan biri və ya hər ikisi ilə qarşılaşsam - ümid edirəm ki, belə olacaq - bu, finala çıxacağım deməkdir. O zaman qazanmaq üçün əlimdən gələni edəcəyəm.
Həqiqətən də şansım olduğunu düşünürəm. Bunda heç bir şübhə yoxdur. Ot üzərindəki nəticələrim, hətta keçən illərdə belə, bu səthdə nə qədər inamım olduğunu göstərir. Bu il çox yaxşı tennis oynadım. Özümü yaxşı hiss edirəm, inamım və motivasiyam var ki, sona qədər gedim. Görəcəyik nə olacaq.
Wimbledon 
