"Ən yaxşılar ilə rəqabət apara bilən oyunçuların sayı daha çoxdur" – Tsitsipas
Karyerasının çətin bir dövründə olan Stefanos Tsitsipas, ATP reytinqində 26-cı yerdədir. Uzun aylardır çətinliklər yaşayan yunan tennisçu, əvvəllər üç ən yaxşı oyunçudan biri olsa da, xüsusilə Qran Slam turnirlərindəki zəif nəticələri səbəbilə tədricən aşağı düşüb.
Wimbledon turnirində arxa ağrıları səbəbilə erkən mübarizəni dayandırdıqdan sonra Tsitsipas, dünya tennisində səviyyənin dəyişməsi və ona görə də ən yaxşı oyunçulara problem yarada biləcək daha çox tennisçinin olması barədə fikirlərini bölüşdü.
"İndi top 10-da olan oyunçulara problem yarada biləcək daha çox tennisçi var. Düşünürəm ki, hazırkı dövrdə top 30-da olmaq daha çətindir. Bu gün Masters 1000 turnirinin üçüncü turunda oynayanda, səviyyə ilk başladığım vaxtdakı kimi deyil.
Deyərdim ki, indi səviyyə daha yüksəkdir. Turnirlərdə əvvəlkindən daha erkən çətin oyunlar olur. Ən yaxşılar ilə rəqabət apara bilən oyunçuların sayı daha çoxdur. Keçmişdən fərqli olaraq, daha az "boşluq" var.
Bunun səbəblərindən biri də, məncə, tennisin fiziki cəhətdən daha vacib olduğu bir idman növünə çevrilməsidir. Texnologiyaya çıxış, oyununuzu yaxşılaşdıracaq bəzi şeyləri təkmilləşdirə bilmək...
İndi əvvəlkindən daha çox yaxşı məşqçi var. Bu, hər kəsin tennisin inkişafı üçün çalışdığını göstərir. Bir çox oyunçunun bizim dövrümüzdəkindən daha çox imkanı var və onlar bu imkanlardan ən yaxşı şəkildə istifadə etməyə çalışırlar" – Tsitsipas Tennis365-ə açıqladı.
