"Hər birimiz özümüzü daha da irəli aparmaq üçün bizi sıxışdıran birinə ehtiyac duyuruq" – Sinner Alkaraz haqqında belə deyib
Jannik Sinner və Karlos Alkaraz arasındakı rəqabət artıq dövrün "Böyük 3"-lük sistemini əvəz etdi. Dünyanın ən yaxşı iki tennisçisi 2024-cü il mövsümünün başlanğıcından bəri son yeddi Qran Slam titulunu qazandılar.
İtalyan və ispan tennisçilər iyun ayında Roland Qarrosda finalda qarşılaşdılar və son günlərdə də Vimbldon çempionatında yenidən üz-üzə gəldilər. Bir şey aydındır ki, bu iki oyunçu tennis dünyasının zirvəsində qərarlaşıblar və onları oradan çıxarmaq üçün çox çalışmaq lazımdır.
London turnirində 4-cü Qran Slam titulunu qazanan Sinner, Alkarazla olan rəqabətindən bəhs edərək, ispanın səviyyəsinin onu hər gün daha da yaxşılaşdırmağa sövq etdiyini bildirdi.
"Hər oyunun öz hekayəsi var. Parisdə çox yaxın idim, amma Karlos (Alkaraz) məni daha yaxşı tennisçi edir. Kiməsə qarşı bu qədər dəfə məğlub olduqda, nəticəni dəyişdirmək üçün çox çalışmaq lazımdır və mən Vimbldonda bunu bacardığıma görə xoşbəxtəm.
Karlosla biz artıq kortda böyük bir rəqabət aparırıq, amma kortdan kənarda da əsl dostluq paylayırıq. Hər birimiz özümüzü daha da irəli aparmaq üçün bizi sıxışdıran birinə ehtiyac duyuruq və hər dəfə kortda üz-üzə gəldikdə, rəqibimizi məğlub etməyə çalışırıq, baxmayaraq ki, ona böyük hörmət bəsləyirəm.
Vimbldonu qazanmaq inanılmaz bir hissdir. 24 saat ərzində nə etdiyimin şüurunda deyildim, amma indi başa düşürəm ki, bu həqiqətən xüsusi bir şeydir. Bütün ailəm orada idi və bu titulu onlarla və komandamla birlikdə qeyd etmək gözəl idi" – Sinner AS-ə belə açıqladı.
