Gündəlik ulduz olmağa ehtiyac yoxdur", Alkarazın tənqidlərlə əlaqəsi haqqında etirafları
Kiçik yaşlarından etibarən diqqət mərkəzində olan Alkaraz, bir sıra tənqidlərlə üzləşməli oldu. Əvvəlcə bu tənqidlər onu təsirləndirsə də, ispan tennisçi psixoloqun köməyi ilə onlarla necə başa çıxmağı öyrəndi. Dünya reytinqində 2-ci sırada olan Alkaraz, "Qazzetta"ya verdiyi müsahibədə tennis ulduzu kimi həyatının gətirdiyi təzyiqlə başa çıxmaq üçün zehni cəhətdən necə çalışdığını ətraflı şəkildə izah etdi.
"Təxminən beş ildir ki, onunla (psixoloqla) işləyirəm və bu, mənə çox kömək edir. Keçmişlə müqayisədə həqiqətən fərqi hiss edirəm. Bəzən mənə mənfi düşüncələr gəlir, amma o, mənə onlarla necə başa çıxmağı öyrədir. Oyunlarla bağlı stresslə başa çıxmaq üçün mənə məsləhətlər verdi və vəziyyət çox yaxşılaşdı.
Dediyim kimi, hər şey başdadır. Amma bu, yalnız zehni məsələ deyil: bu, həm də oyundan və ona yanaşma tərzindən asılıdır. Bunun haqqında çox düşünməməyə çalışıram, çünki bir zamanlar tənqidlər məni çox təsirləndirirdi və bu, çox çətin bir dövr idi.
Buna görə də indi bəzi sözlərə çox əhəmiyyət verməməyə çalışıram. İllər keçdikcə başa düşdüm ki, hər kiçik addım vacibdir və hətta məğlubiyyətlərdən də öyrənmək olar. Gündəlik ulduz olmağa ehtiyac yoxdur, əsas olan davamlı olmaq və təkmilləşmək üçün çalışmaqdır. Həmişə.
