"Ümid edirəm ki, bu mümkün qədər gec baş versin", Kostyuk tennisdə neytral bayraqların sonu barədə danışır

Ukrayna və Rusiya 2022-ci ilin fevralından bəri müharibə vəziyyətindədir və bu, idman sahəsində də öz təsirini göstərib. Həmin tarixdən etibarən rusiyalı və belarusiyalı idmançılar yarışlarda iştirak edə bilər, lakin ancaq neytral bayraq altında.

Top 30-da yer alan ukraynalı tennisçi Marta Kostyuk bilir ki, söhbət gedən oyunçular bütün karyeraları boyu neytral bayraq altında çıxış etməyəcək və vaxtı gəldikdə öz bayraqlarını geri qazanacaqlar. O, öz baxışını yerli media orqanlarına verdiyi müsahibədə izah edir.

"ATP və WTA-nın ilkin məqsədi müharibənin özü turnirlərdə yer tutmasının qarşısını almaq idi. Bizim tələbimizlə onlar müharibənin beşinci günündə neytral bayraq qaldırdılar.

Sonra Lesya Tsurenko və mən çox səy göstərdik, çünki Elina (Svitolina) həmin vaxt analıq məzuniyyətində idi və biz o vaxt tək idik. Mən rus və belarusiyalıları turnirlərdən kənarlaşdırmaq üçün çox çalışdım.

Təəssüf ki, buna nail ola bilmədim, çünki nə qaydaları, nə də qanunları dəyişə bilmərik. Onlar hesab etdilər ki, fərdi oyunçular öz ölkələrinin hərəkətlərinə görə məsuliyyət daşımır. Ən azı onlardan ictimai mövqe tutmağı tələb etdik, çünki siz təcavüzkar bir ölkəni təmsil edirsinizsə, bir mövqeyiniz olmalıdır.

Əgər onları dəstəkləyirsinizsə, yaxşıdır, bu sizin hüququnuzdur, amma bunu deyin ki, insanlar bilsin. Bu baş vermədi. Çoxlu oyunçu vətəndaşlığını dəyişir, bu da məncə müsbət bir əlamətdir.

Kimsə vətədaşlığını dəyişəndə, çox adam öz-özünə deyir: "O, müharibə barədə nə isə dedimi?" Mən isə deyirəm: "Yaxşı, o heç nə demədi, amma artıq bu inanılmaz addımı atıb. O, artıq həmin ölkəni təmsil etmir və yəqin ki, bir daha heç vaxt təmsil etməyəcək və bu, bizim üçün artıq qələbədir."

Tərəqqi var. Oyunçular neytral bayraqla oynasa belə, bu, müəyyən bir narahatlıq yaradır, çünki insanlar yenə də onların haradan gəldiyini bilir. Biz onların neytral olduğunu vurğulamaqdan başqa heç nə edə bilmərik, çünki bu gün də qüvvədə olan budur.

Müharibə başlayanda mənim bu gün etdiyim işləri görə bilmək üçün lazımlı biliklərim yox idi. Mən 19 yaşlı, bacardığının hamısını etməyə çalışan bir qız idim. Bu, mənə çox enerjiyə başa gəldi, amma mövqeyimdə səbir etdim, çünki baş verənlər mənim üçün qəbuledilməz idi.

Mən bacardığım hər şeyi etməyə çalışacağam, onlara bayraqlarını qaytarmamaq qərarına təsir göstərə biləcək qurumlara müraciət edəcəyəm, amma bunun heç vaxt baş verməyəcəyinə dair zəmanət ala bilməyəcəyik. Erkən ya da gec, hamımız bilirik ki, bu baş verəcək. Ümid edirəm ki, bu an mümkün qədər gec gələr", - deyə Kostyuk Tribuna media orqanı üçün belə bildirib.